會員心聲

由細到大，’肥’同’豬‘ 呢兩個字從未從我的花名或乳名中消失過。小時候當然冇咁介意人地咁叫，但當個人大左會開始介意俾人咁叫特別在街上。但遍遍自己又唔爭氣，又為食又大食，由細到大都喜歡食公仔麵同炸物。試過大學時期每晚深夜温完書食2-3個印尼撈麵先瞓(兩個星期食左一箱)。到2008年返香港呢個美食天堂做嘢，更加冇王管乜都食，到結完婚同兩個小朋友出世去到100kg同32% body fat加上body check驗到有脂肪肝先知驚。因為唔想將來睇唔到小朋友大個就下決心減肥。不停上網睇有乜餐單可以試，試過只食雞柳同西籣花，試過只飲菜湯，試過每月買$3000”草本生命”蛋白粉做代餐。幾個月只減左2-3磅，但因為太悶所以好快就放棄。

有一日同朋友講開減肥，佢介紹左佢嘅營養師俾我，話呢個營養師好好一定幫到我，開頭都半信半疑因爲一向聽人講話見營養師乜都冇得食只為減到磅。所以就上佢 Facebook睇吓信唔信得過，睇多左Facebook d post見到佢會用好容易明白嘅方法去令大家明白點先食得健康。 由2017年6月開始見營養師，正式開始左健康減肥之路，亦是我俾自己的最後減肥機會，如果今次都唔得就由自己肥落去吧。營養師不但會分享好多減肥同食物知識，又會教我應該點食，就算去街食都一樣可以食得好輕鬆食住瘦。(仲可以食同米線)

呢一年我學到嘅知識是非常之多，是終身受用的。由乜都食到學識點食得飽而又健康，學識做什麼運動可以幫到減肥。呢一年減左60磅，body fat由32%減到17%，脂肪肝都冇左。由當日跑完10k要休息45分鐘先行得，到現在可以輕鬆跑10k。

減肥從來都唔容易，但如果呢個路程上你可以好似我咁揾到一個全心全意去幫你的營養師，條路會易行好多同多好多歡樂，更加唔會因爲迷失而放棄。

好多謝你咁用心去幫我呢個肥仔去重生，可以令到我有健康嘅身體去見證我兩個小朋友長大，承諾你我唔會俾自己加返磅。

Thank you very much from the bottom of my heart