最新消息

 

呢個海綿蛋糕完全無添加油、而且減咗一半糖~ 所以減肥朋友都食得!
今次用咗日本新鮮雞蛋,蛋味特別香濃~
新鮮出爐香噴噴,軟綿綿,唔駛5分鐘就已經同屋企人食晒~

 

材料:

蛋黃 3隻

稀少糖 2大湯匙

鮮奶 2湯匙

蛋白 3隻

砂糖 30克

檸檬汁 2茶匙

低筋麵粉 60克

 

做法: 

 

1. 預熱焗爐至 170C 。(有熱風對流)

2. 把蛋黃和稀少糖放在盤中,以電動打蛋器用中速攪拌至發白,再加入鮮奶攪拌。

 

3. 篩入低筋麵粉,輕手拌勻。

❤️溫馨提示:千祈唔好當佢係仇人咁太用力啊!會令麵粉起筋,之後蛋糕就變得煙韌唔鬆軟㗎喇!

 

 

4. 將蛋白放入乾淨嘅盤中。

❤️溫馨提示:一定要係非常乾淨,一有任何油分,蛋白就發唔起㗎啦!

 

 

5. 用電動打蛋器中速,打發至稍為起泡。加入1/3糖,繼續打發,加入另外1/3糖分及檸檬汁,打發至蛋白變白。

❤️溫馨提示:檸檬汁可以令蛋白變企身,因為食譜中加入的砂糖比較少,所以要加入少少檸檬汁或者白醋或者他他粉~

 

6. 最後加入餘下的糖,打發至蛋白企身。將打蛋器變慢速,打30秒,可以令蛋白變得幼細啲,焗出嚟嘅蛋糕會比較綿密~

 

7. 最後就係最考功夫嘅步驟!將 1/3蛋白霜輕手拌入步驟3.的蛋黃混合物中,記住要輕手啲,慢慢fold-in,否則會令蛋白泡泡消失,蛋糕就會發唔起㗎啦!再將餘下的 1/3蛋白霜拌勻,再非常輕手輕手輕手地拌入餘下的蛋白霜,成蛋糕漿。

 

 

8. 將7.的蛋糕漿倒進已鋪烘培紙的6寸蛋糕模中,放入已預熱的焗爐中,焗約 12-14分鐘,直至見到蛋糕表面已經變色變乾。然後把蛋糕稍為拿出,快速用鋒利嘅刀割十字,大約半厘米的深度就夠啦!唔好切得太深!之後蛋糕會慢慢升高,十字紋就會更加明顯!呢個步驟要好快,因為蛋糕喺受熱途中拎出嚟,會迅速塌下來,要盡快切完十字就要9秒9放返入去焗爐!(所以唔好意思啦,影唔到相示範)

 

9. 再焗大約10分鐘,至蛋糕變金黃色,用牙籤插入蛋糕中央,沒有麵糊黏著,就代表熟啦!

❤️溫馨提示:如果你嘅焗爐比較細,蛋糕同發熱線之間比較近,建議可以用錫紙遮住蛋糕表面,以免焗燶

 

10. 可以放出嚟倒扣在鐵架上,待完全放涼脫模。不過一出爐我哋就已經食晒啦~我對新鮮出爐嘅蛋糕最冇抗拒能力! 

❤️溫馨提示:記住呢個蛋糕冇任何化學添加劑、又無油減糖,所以兩日之內好食晒啦!