父親節整咗個健康版焗豬扒飯，寫好食譜啦！
我小時候，爸爸會帶我去快餐店食焗豬扒飯，到大個做咗營養師，知道一個約1300kcal，怕肥嘅我就嚇到唔夠膽去食！
知道爸爸到現在，會靜靜雞走去焗豬扒飯同炒麵，就整一個健康版本俾佢啦～ 用少啲油炒飯、煎豬扒代替油炸豬扒、用鮮蕃茄煮醬汁，但為咗還原，當然最後要加番少少拉絲芝士啦！要屋企人食得健康啲，唔可以下下都講唔食得唔食得，要花啲心思去氹吓佢哋～食得健康都可以好味呀！
傳統焗豬扒飯約1300kcal，現在每人份量只有約500卡～ 只要做以下四步，油份可以減省約70%呀！
1. 用易潔鑊少油炒飯、炒番茄洋蔥煮醬汁
2. 用瘦豬柳代替肥豬扒（今次澳洲呢隻好腍）
3. 用少油煎豬扒，代替炸豬扒
4. 控制芝士份量
以下係文字版本～如果想睇片，可以睇Instagram reels~ 大家鍾意睇片定文字多啲呢？留言話我知，等我日後整多啲俾大家～
材料 (4人份量)：
無骨豬扒 300克
白飯 4碗
雞蛋 1隻
馬蘇里拉芝士 50克
油 2茶匙
豬扒醃料：
生抽 1湯匙
糖 1茶匙
粟粉 1湯匙
水 1湯匙
胡椒粉 1/2茶匙
蕃茄醬汁材料：
洋蔥 1個
蒜蓉 2茶匙
茄汁 3湯匙
蕃茄 2個
盒裝蕃茄碎 1盒
粟粉 1湯匙
水 2湯匙
調味料：
鹽 <1/2茶匙
糖 2茶匙
做法：
1. 將豬扒洗淨，抹乾，用刀背刴至鬆軟。用豬扒醃料拌勻，醃約20 分鐘。
2.預熱焗爐至 200度。
3.燒熱易潔鑊，下一茶匙油，加入白飯，倒入蛋液炒勻。將炒飯盛起平均放在焗盆上 ，備用。
4. 燒熱易潔鑊，下一茶匙油，將醃好的豬扒煎至9成熟，然後放在焗盤中的炒飯上。
5. 在原鑊中 ，利用餘下的油，放人洋蔥以慢火炒香。順序加入蕃茄醬汁材料炒勻 ，煮至所有材料軟身。 粟粉水先預先拌勻，再加入醬汁中，煮至濃稠。
6. 將蕃茄醬汁倒入焗盤 ，鋪在豬扒及炒飯上。
7. 再灑上馬蘇里拉芝士。
8. 放入己預熱至200度的焗爐中 ，焗 8-10分鐘 （表面金黃色）即成。
