前日母親節煮咗大餐，最受歡迎係呢個韓式燉牛展~ 一大鍋都極速食晒！
正宗嘅食譜係用牛肋條，但我想屋企人食得健康啲，所以用咗低脂嘅牛展取代~ 脂肪少60%架！牛展中間透明嘅唔係脂肪嚟㗎！而係可以修護皮膚嘅骨膠原蛋白，所以燉咗三個鐘頭之後～咬落啖啖膠質～又腍又好食！
而且我用咗稀少糖取代傳統韓國嘅糖漿～ 然後加咗清甜嘅韓國梨、韓國大根、紅棗、洋蔥、甘筍去添加天然嘅蔬果甜味！再加韓式醬油～就更惹味啦！
食材：
牛展 1公斤
韓國梨 1個（大）
甘荀 ２條
白蘿蔔 １條
紅棗 20粒 ( 小 )
大蔥 2條
洋蔥 1個
蒜頭 10粒
薑片 4片
熱水 2碗
調味料：
韓式醬油 ( 湯用 ) 250毫升
稀少糖 5湯匙
味醂 100毫升
步驟：
1. 先將甘荀、白蘿蔔洗淨去皮，滾刀切塊。洋蔥去皮切塊，大蔥切段，韓國梨去皮去芯，切塊備用。蒜頭去衣拍扁。紅棗去核。( 若想減少白蘿蔔的渣，可把白蘿蔔的皮刨深一些，至晶瑩剔透的位置 )
2. 將牛肉出水。凍水下肉，待至水滾及表面浮泡，便可盛起放涼切件。
3. 在一個深鍋中，下油，先炒香洋蔥，再加入蒜頭和薑片。
4. 再加入牛肉稍為煎香，再加入甘荀、韓國梨、紅棗和大蔥。
5. 隋即加入熱水和調味料，煮滾。
6. 煮滾後熄火蓋上蓋子，放入已預熱180度的焗爐約1.5小時，期間可攪拌一下以防黏底。
7. 1.5小時後，把鍋子盛出再加入白蘿蔔，以小火煮半小時。不用再加水！因蘿蔔會出水~
8. 最後可因應自己的口味再下醬油或稀少糖。完成！ ( 因每種蔬果的甜味都不同 )
